Amours diverses/Aller en marchandises aux Indes precieuses
La bibliothèque libre.
Auteur: Pierre de Ronsard (1524-1585)
Recueil : Amours Diverses
Aller en marchandises aux Indes precieuses,
Sans acheter ny or ny parfum ny joyaux:
Hanter, sans avoir soif, les sources et les eaux:
Frequenter sans bouquets les fleurs delicieuses,
Courtiser et chercher les Dames amoureuses,
Estre tousjours assise au milieu des plus beaux,
Et ne sentir d'Amour ny fleches ny flambeaux,
Ma Dame, croyez moy, sont choses monstrueuses.
C'est se tromper soymesme: aussi tousjours j'ay creu
Qu'on pouvoit s'eschaufer en s'approchant du feu,
Et qu'en prenant la glace et la neige on se gelle.
Puis il est impossible, estant si jeune et belle,
Que vostre cœur gentil d'Amour ne soit esmeu,
Sinon d'un grand brasier, au moins d'une estincelle.
