Amours diverses/Amour, je pren congé de ta menteuse escole

Auteur: Pierre de Ronsard (1524-1585)

Recueil : Amours Diverses

Amour, je pren congé de ta menteuse escole
Où j'ay perdu l'esprit, la raison et le sens,
Où je me suis trompé, où j'ay gasté mes ans,
Où j'ay mal employé ma jeunesse trop folle.

Malheureux qui se fie en un enfant qui volle,
Qui a l'esprit soudain, les effects inconstans,
Qui moissonne noz fleurs avant nostre printens,
Qui nous paist de creance et d'un songe frivole.

Jeunesse l'alaicta, le sang chaut le nourrit,
Cuider l'ensorcela, paresse le pourrit,
Tout enflé de desseins, de vents et de fumees.

Cassandre me ravit, Marie me tint pris:
Ja grison à la Cour d'une autre je m'espris.
Si elles m'ont aimé, je les ay bien aimees.