| LIVRE 1 CHAPITRE 25 | ◄ | De la sagesse, trois livres | ► | LIVRE 1 CHAPITRE 27 |
LIVRE 1 CHAPITRE 26
espoir, desespoir.
les desirs et cupiditez s' eschauffent et redoublent par l' esperance, laquelle allume de son doux vent nos fols desirs, embrase en nos esprits un feu d' une espaisse fumée, qui nous esblouist l' entendement, et, emportant avec soy nos pensées, les tient penduës entre les nuës, nous faict songer en veillant. Tant que nos esperances durent, nous ne voulons poinct quitter nos desirs ; au contraire, quand le desespoir s' est logé chez nous, il tourmente tellement nostre ame de l' opinion de ne pouvoir obtenir ce que nous desirons, qu' il faut que tout luy cede, et que, pour l' amour de ce que nous pensons ne pouvoir obtenir, nous perdions mesme le reste de ce que nous possedons. Ceste passion est semblable aux petits enfans, qui, par despit de ce que l' on leur oste un de leurs jouets, jettent les autres dedans le feu : elle se fasche contre soy-mesme, et exige de soy la peine de son malheur. Après les passions qui regardent le bien apparent, venons à celles qui regardent le mal.
