| LIVRE 1 CHAPITRE 20 | ◄ | De la sagesse, trois livres | ► | LIVRE 1 CHAPITRE 22 |
LIVRE 1 CHAPITRE 21
Des passions en particulier. Advertissement. Il sera traicté de leur naturel, pour y voir la folie, vanité, misere, injustice et laideur, qui est en elles, affin de les cognoistre et apprendre à les justement hayr. Les advis pour s’en garder seront aux livres suyvans ; ce sont les deux parties du medecin, declarer la maladie, et donner les remedes. Voyci les maladies de l’esprit. Au reste nous parlerons icy premierement de toutes celles qui regardent le bien apparent, qui sont amour et ses especes, desir, espoir, desespoir, joye ; et puis toutes celles qui regardent le mal, qui sont plusieurs ; cholere, hayne, envie, jalousie, vengeance, cruauté, crainte, tristesse, compassion. de l’amour en general.
la premiere maistresse et capitale de toutes les passions est l’amour, qui est de divers subjects, et de diverses sortes et degrez. Il y en a trois principaux, ausquels tous se rapportent (nous parlons du vitieux et passionné ; car du vertueux, qui est amitié, charité, dilection, sera parlé en la vertu de la justice) ; sçavoir l’ambition ou superbe, qui est l’amour de grandeur et honneur ; l’avarice, amour des biens ; et l’amour voluptueux et charnel. Voylà les trois goulphes et precipices d’où peu de gens se sauvent, les trois pestes et corruptions de tout ce qu’avons en maniement, esprit, corps et biens ; les armeures des trois capitaux ennemys du salut et repos humain, le diable, la chair, le monde. Ce sont à la verité trois puissances, les plus communes et universelles passions, dont l’apostre a party en ces trois tout ce qui est au monde : (…). L’ambition, comme spirituelle, est plus noble et hautaine que les autres. L’amour voluptueux, comme plus naturel et universel (car mesme aux bestes où les autres ne se trouvent poinct), il est plus violent et moins vitieux ; je dis violent tout simplement, car quelquesfois l’ambition l’emporte : mais c’est une maladie particuliere ; l’avarice est la plus sotte et maladifve de toutes.
