| LIVRE 1 CHAPITRE 29 | ◄ | De la sagesse, trois livres | ► | LIVRE 1 CHAPITRE 31 |
LIVRE 1 CHAPITRE 30
jalousie.
jalousie est passion presque toute semblable, et de nature et d’effect, à l’envie, sinon qu’il semble que, par l’envie, nous ne considerons le bien qu’en ce qu’il est arrivé à un autre, et que nous le desirons pour nous ; et la jalousie est de nostre bien propre, auquel nous craignons qu’un autre participe. Jalousie est maladie d’ame foible, sotte et inepte, maladie terrible et tyrannique ; elle s’insinue soubs tiltre d’amitié : mais après estre en possession, sur les mesmes fondemens de bienveillance, elle bastit une hayne capitale ; la vertu, la santé, le merite, la reputation, sont les bouttefeus de ceste rage. C’est aussi un fiel qui corrompt tout le miel de nostre vie : elle se mesle ordinairement ez plus doulces et plaisantes actions, lesquelles elle rend si aigres et si ameres que rien plus : elle change l’amour en hayne, le respect en desdain, l’asseurance en defiance. Elle engendre une curiosité pernicieuse de se vouloir esclaircir de son mal, auquel il n’y a poinct de remede qui ne l’empire et ne l’engrege : car ce n’est que le publier, arracher de l’ombre et du doubte pour le mettre en lumiere, et le trompetter par-tout, et estendre son malheur jusques à ses enfans. (…).
