Je suis pour vostre amour diversement malade
La bibliothèque libre.
Auteur: Pierre de Ronsard (1524-1585)
Recueil : Amours Diverses
Je suis pour vostre amour diversement malade
Maintenant plein de froid, maintenant de chaleur:
Dedans le cœur pour vous autant j'ay de douleur,
Comme il y a de grains dedans ceste Grenade.
Yeux qui fistes sur moy la premiere embuscade,
Des-attisez ma flame, et desseichez mes pleurs:
Je faux, vous ne pourriez: car le mal, dont je meurs,
Est si grand, qu'il ne peut se guarir d'une oeillade.
Ma Dame, croyez moy, je trespasse pour vous:
Je n'ay artere, nerf, tendon, veine ny pous,
Qui ne sente d'Amour la fiévre continue.
L'Amour à la Grenade en symbole estoit joint:
Ses grains en ont encore la force retenue,
Que de signe et d'effect vous ne cognoissez point.
