Les Œuvres/À monsieur Ménard
Aduocat en la chambre mi partie de Castres.
e n’eusse iamais creu voir ton ame glacée
Par les fleches d’amour en fin eſtre percée,
Qui fouloit par deſdain les myrthes de Cypris :
Il faut que ceſt œil ſoit de nature diuine,
Dont les charmants attraits ont mis en ta poitrine
Ce feu ſacré, qui t’a si vivement eſpris.
Ie benis le moment où tu receus l’attainte
Par cet œil, Ie ſubiect de ta mignarde plainte,
Qui te fait exaller tant d’amoureux ſouſpirs :
Car ſans luy tu n’aurois offert en ſacrifice
Sur Phocide tes vœus, ny ton cœur dans Erice,
Et pour eſtre immortel eſclorre tes deſirs.
Heureux, qui comme toy, de sa flame nouuelle
A pour cauſe premiere vne Nymphe ſi belle,
Il trouue de la gloire en sa captiuité :
Et ne peut, eſchauffé de ſa douce preſence,
Que d’un vol glorieux au ciel il ne s’eſlance,
Pour y chanter ſon heur iusqu’a l’eternité
Pour t’affranchir d’oubly, et vaincre le treſpas,
D’eſtre amant seulement assez ce n’eſtoit pas,
(Mon Menard) il falloit que tu fuſſes poete :
Car ie ſcay qu’il y a un bon nombre d’amans,
N’ayant côme tu fais, ſceu peindre leurs tourmens,
Qui giſent ſans honneur, ſoubs la cendre muette.
I’eusse mieux autresfois veu l’Aſcrean deſcendre
Que toy, dans Cytheron, ou ſur l’eau du Meandre
Les Signes s’eſgayer : mais plus ie n’oſerois
Approcher le rameau qui dignement t’ombrage,
Et ton chef glorieux, & ton diuin ouurage,
Ny mes chans eſgaller au doux air de ta voix.
Celle donc qui d’amour premiere ouurit le temple
A tes feux, & celuy qui t’a ſeruy d’exemple
A grimper ſur Parnaſſe, & boire la liqueur
D’Hyppocrene, merite vne immortelle gloire,
Puiſqu’ores le premier des preſtres de memoire,
Tu es fils de Cythere, & des Muſes l’honneur.
François le Bailly,
Sieur de Vaucharme & de Saincte Vertu, docteur es droicts, Aduocat en Parlement.
