A TRES-ILLUSTRE ET TRES-VERTUEUSE Dame Marguerite de Rohan, Marquise de Duretal, et Dame d’Espinay.
MADAME,
Ayant recogneu que la premiere odeur de ces Fleurs, baptisees de vostre auguste nom, vous avoit esté fort agreable, par le tesmoignage mesme qu’il vous pleut de m’en redre, les vous presentant en vostre maison paternelle et Chasteau Royal du Verger (d’où elles furent incontinent arosees de vos liberalitez et faveurs) je me suis encouragé de les vous consacrer encore une fois mieux diaprees et plus odoriferantes qu’elles n’estoyent alors, tant pour m’acquiter de mon devoir, que pour me desengager de la promesse que je vous en avois faite. Que si l’odeur des premieres vous a donné quelque contentement, j’espere que celle des dernieres ne vous sera pas moins plaisant. Je vous supplieray donc, Madame, de les recevoir d’aussi bonne volonté, que humblement je les vous presente : Et outre que l’authorité de vostre nom leur servira comme d’un Soleil gracieux, pour les conserver eternellement verdoyantes par toute la France, vous m’obligerez encor particulierement à demeurer toute ma vie,
MADAME,
Vostre tres-humble et tres-obeissant serviteur
Fr. Des-rues.
