La bibliothèque libre.
Ceulx donc qui me font telle oppresse,
En meurte ne me vouldroient veoir.
XVI.
Se, pour ma mort, le bien publique
D'aucune chose vaulsist myeulx,
A mourir comme ung homme inique
Je me jugeasse, ainsi m'aid Dieux!
Grief ne faiz a jeune ne vieulx,
Soye sur pied ou soye en biere:
Les montz ne bougent de leurs lieux,
Pour un paouvre, n'avant, n'arriere.
XVII.
Au temps que Alexandre regna,
Ung hom, nomme Diomedes,
Devant luy on luy amena,
Engrillonne poulces et detz
Comme ung larron; car il fut des
Escumeurs que voyons courir.
Si fut mys devant le cades,
Pour estre juge a mourir.
XVIII.
L'empereur si l'arraisonna:
"Pourquoy es-tu larron de mer?"
L'autre, responce luy donna:
"Pourquoy larron me faiz nommer?
"Pour ce qu'on me voit escumer
"En une petiote fuste?
"Se comme toy me peusse armer,
"Comme toy empereur je fusse.
