La bibliothèque libre.
Les ames desquelz Dieu embrasse,
On n'y voyt couronnes ne sceptres.
XXXVI.
De pouvrete me guermentant,
Souventesfoys me dit le cueur:
"Homme, ne te doulouse tant
Et ne demaine tel douleur,
Se tu n'as tant qu'eust Jacques Cueur.
Myeulx vault vivre soubz gros bureaux
Pauvre, qu'avoir este seigneur
Et pourrir soubz riches tumbeaux!"
XXXVII.
Qu'avoir este seigneur!... Que dys?
Seigneur, lasse! ne l'est-il mais!
Selon ce que d'aulcun en dict,
Son lieu ne congnoistra jamais.
Quant du surplus, je m'en desmectz.
Il n'appartient a moy, pecheur;
Aux theologiens le remectz,
Car c'est office de prescheur.
XXXVIII.
Si ne suys, bien le considere,
Filz d'ange, portant dyademe
D'etoille ne d'autre sydere.
Mon pere est mort, Dieu en ayt l'ame,
Quant est du corps, il gyst soubz lame...
J'entends que ma mere mourra,
Et le scait bien, la pauvre femme;
Et le filz pas ne demourra.
