La bibliothèque libre.
C'est que ne puys remede y mettre,
Ne que monnoye qu'on descrie."
XLVII.
Ceste lecon icy leur baille
La belle et bonne de jadis;
Bien dit ou mal, vaille que vaille,
Enregistrer j'ay faict ces ditz
Par mon clerc Fremin l'estourdys,
Aussi rassis que je pense estre...
S'il me desment, je le mauldys:
Selon le clerc est deu le maistre.
XLVIII.
Si apercoy le grand danger
La ou l'homme amoureux se boute...
He! qui me vouldroit laidanger
De ce mot, en disant: "Escoute!
Se d'aymer t'estrange et reboute
Le barat de celles nommees,
Tu fais une bien folle doubte,
Car ce sont femmes diffamees.
XLIX.
"S'ils n'ayment fors que pour l'argent,
On ne les ayme que pour l'heure.
Rondement ayment toute gent,
Et rient lors quant bourse pleure.
De celles n'est qui ne recoeuvre;
Mais en femmes d'honneur et nom
Franc homme, se Dieu me sequeure,
Se doit employer; ailleurs, non."
