La bibliothèque libre.
LXXIV.
Ou nom de Dieu, comme j'ay dit,
Et de sa glorieuse Mere,
Sans peche soit parfaict ce dict
Par moy, plus maigre que chimere;
Si je n'ay eu fievre effimere,
Ce m'a faict divine clemence;
Mais d'autre dueil et perte amere
Je me tays, et ainsi commence:
LXXV.
Premier, je donne ma pauvre ame
A la benoiste Trinite,
Et la commande a Nostre Dame,
Chambre de la divinite;
Priant toute la charite
Des dignes neuf Ordres des cieulx,
Que par eulx soit ce don porte
Devant le Trosne precieux.
LXXVI.
Item, mon corps j'ordonne et laisse
A nostre grand mere la terre;
Les vers n'y trouveront grand gresse:
Trop lui a faict faim dure guerre.
Or luy soit delivre grand erre;
De terre vint, en terre tourne.
Toute chose, se par trop n'erre,
voulentiers en son lieu retourne.
LXXVII.
Item, et a mon plus que pere,
Maistre Guillaume de Villon
