La bibliothèque libre.
Qui m'a este plus doulx que mere
D'enfant esleve de maillon;
Dejette m'a de maint boillon,
Et de cestuy pas ne s'esjoye,
Si luy requiers a genoillon,
Qu'il m'en laisse toute la joye.
LXXVIII.
Je luy donne ma librairie,
Et le _Rommant du Pet au Diable_,
Lequel maistre Gui Tabarie
Grossoya, qu'est hom veritable.
Par cayers est soubz une table.
Combien qu'il soit rudement faict,
La matiere est si tres notable,
Qu'elle amende tout le meffaict.
LXXIX.
Item, donne a ma bonne mere
Pour saluer nostre Maistresse,
Qui pour moy eut douleur amere,
Dieu le scait, et mainte tristesse;
Autre chastel ou fosteresse
N'ay ou retraire corps et ame,
Quand sur moy court male destresse,
Ne ma mere, la povre femme!
