La bibliothèque libre.
Car il m'a tousjours secouru
A mon grand besoing et affaire:
Pour ce, le jardin luy transfere,
Que maistre Pierre Bourguignon
Me renta, en faisant refaire
L'huys, et redrecier le pignon.
LXXXVI.
Par faulte d'ung huys, j'y perdis
Ung grez, et ung manche de houe.
Alors, huyt faulcons, non pas dix,
N'y eussent pas prins une allouee.
L'hostel est seur, mais qu'on le clouee.
Pour enseigne y mis ung havet;
Qui que l'ait prins, point ne l'en louee:
Sanglante nuict et bas chevet!
LXXXVII.
Item, et pource que la femme
De maistre Pierre Sainct Amant
(Combien, si coulpe y a ou blasme,
Dieu luy pardonne doulcement!)
Me meist en reng de caymant,
Pour le Cheval Blanc qui ne bouge,
Luy changeay a une jument,
Et la Mulle a ung Asne rouge.
LXXXVIII.
Item, donne a sire Denys
Hesselin, Esleu de Paris,
Quatorze muys de vin d'Aulnis,
Prins chez Turgis, a mes perilz.
S'il en beuvoit tant que periz
En fust son sens et sa raison,
