La bibliothèque libre.
Qu'on mette de l'eau es barrilz:
Vin perd mainte bonne maison.
LXXXIX.
Item, donne a mon advocat,
Maistre Guillaume Charruau,
Quoy qu'il marchande ou ait estat,
Mon branc... Je me tays du fourreau,
Il aura, avec ce, ung reau
En change, affin que sa bourse enfle,
Prins sur la chaussee et carreau
De la grand closture du Temple.
Item, mon procureur Fournier
Aura, pour toutes ses corvees
(Simple seroit de l'espargner;
En ma bourse quatre havees),
Car maintes causes m'a saulvees,
Justes, ainsi, JESUS-CHRIST m'ayde!
Comme elles ont este trouvees;
Mais bon droit a bon mestier d'ayde.
XCI.
Item, je donne a maistre Jaques
Raguyer le grant godet de Greve,
Pourveu qu'il payera quatre plaques,
Deust-il vendre, quoy qu'il luy griefve,
Ce dont on ceuvre mol et greve;
Aller sans chausses et chappin,
Tous les matins, quand il se lieve,
Au trou de la Pomme de pin.
