La bibliothèque libre.
CII.
Au cappitaine Jehan Riou,
Tant pour luy que pour ses archiers,
Je donne six livres de lou,
Qui n'est pas viande a porchiers,
Prins a gros mastins de bouchiers,
Et cuittes de vin de buffet.
Pour manger de ces morceaulx chiers,
On en ferait bien un mau faict.
CIII.
C'est viande ung peu plus pesante,
Que duvet, ne plume, ne liege.
Elle est bonne a porter en tente,
Ou pour user en quelque siege.
Et, s'ilz estoient prins en un piege,
Les mastins, qu'ils ne sceussent courre,
J'ordonne, moy qui suis bon miege,
Que des peaulx, sur l'hyver, se fourre.
CIV.
Item, a Robin Troussecaille,
Qui s'est en service bien faict;
A pied ne va comme une caille,
Mais sur roussin gros et reffaict:
Je luy donne, de mon buffet,
Une jatte qu'emprunter n'ose;
Si aura mesnage parfait:
Plus ne luy failloit autre chose.
CV.
Item, donne a Perrot Girard,
Barbier jure du Bourg-la-Royne,
