La bibliothèque libre.
CXII.
Quant de messieurs les Auditeux,
Leur chambre auront lembroysee;
Et ceulx qui ont les culz rongneux,
Chascun une chaise persee,
Mais qu'a la petite Macee
D'Orleans, qui eut ma ceincture,
L'amende soit bien hault taxee:
Elle est une mauvaise ordure.
CXIII.
Item, donne a maistre Francoys,
Promoteur de la vacquerie,
Ung hault gorgerin d'Escossoys,
Toutesfois sans orfaverie;
Car, quant receut chevalerie,
Il maugrea Dieu et saint George.
Parler n'en oyt qu'il ne s'en rie,
Comme enrage, a pleine gorge.
CXIV.
Item, a maistre Jehan Laurens,
Qui a les povres yeulx si rouges,
Par le peche de ses parens,
Qui beurent en barilz et courges,
Je donne l'envers de mes bouges,
Pour chascun matin les torcher...
S'il fust archevesque de Bourges,
Du cendal eust, mais il est cher.
CXV.
Item, a maistre Jehan Cotard,
Mon procureur en Court d'Eglise,
