La bibliothèque libre.
CXVIII.
Si vueil qu'ilz voysent a l'estude;
Ou? chez maistre Pierre Richer.
Le _Donnait_ est pour eulx trop rude:
Ja ne les y vueil empescher.
Ilz scauront, je l'ayme plus cher:
_Ave salus, tibi decus_,
Sans plus grandes lettres chercher:
Tousjours n'ont pas clercs le dessus.
CXIX.
Cecy estudient, et puis ho!
Plus proceder je leur deffens.
Quant d'entendre le grand _Credo_,
Trop fort il est pour telz enfans.
Mon grant tabard en deux je fendz:
Si vueil que la moictie s'en vende,
Pour eulx en achepter des flans,
Car jeunesse est ung peu friande.
CXX.
Et veuil qu'ilz soyent informez
En meurs, quoy que couste bature;
Chapperons auront enfermez,
Et les poulces soubz la ceincture;
Humbles a toute creature;
Disans: _Hen? Quoy? Il n'en est rien!_
Si diront gens, par adventure:
"Voycy enfans de lieu de bien!"
CXXI.
Item, a mes pouvres clergeons,
Auxquelz mes titres je resigne,
