La bibliothèque libre.
Si m'ont-ilz voulu aydier,
Et de leurs biens faire confrere;
Combien que Francoys, mon compere,
Contre langues flambans et rouges,
Sans commandement, sans priere,
Me recommanda fort a Bourges.
CXXXI.
Si aille veoir en Taillevent,
Ou chapitre de fricassure,
Tout au long, derriere et devant,
Lequel n'en parle jus ne sure;
Mais a Macquaire vous asseure,
A tout le poil cuysant ung dyable,
Affin que sentist bon l'arsure,
Ce _Recipe_ m'escript, sans fable.
[modifier] BALLADE (DES LANGUES ENNUIEUSES)
En reagal, en arsenic rocher,
En orpigment, en salpestre et chaulx vive;
En plomb boillant, pour mieulx les esmorcher;
En suif et poix, destrampez de lessive
Faicte d'estronts et de pissat de Juifve;
En lavaille de jambes a meseaulx;
En raclure de piedz et vieulx houseaulx;
En sang d'aspic et drogues venimeuses;
En fiel de loups, de regnards et blereaux,
Soient frittes ces langues envieuses!
En cervelle de chat qui hayt pescher,
Noir, et si vieil qu'il n'ait dent en gencive;
