La bibliothèque libre.
CXLII.
Item, a Noe le Jolys,
Autre chose je ne luy donne,
Fors plein poing d'osiers frez cueilliz
En mon jardin; je l'abandonne.
Chastoy est une belle aulmosne;
Ame n'en doit estre marry.
Unze vingtz coups lui en ordonne,
Par les mains de maistre Henry.
CXLIII.
Item, ne scay que a l'Hostel-Dieu
Donner, n'aux povres hospitaulx;
Bourdes n'ont icy temps ne lieu,
Car povres gens ont assez maulx.
Chascun leur envoye leurs os.
Les Mandians ont eu mon oye;
Au fort, ilz en auront les os:
A menues gens menue monnoye.
CXLIV.
Item, je donne a mon barbier,
Qui se nomme Colin Galerne,
Pres voysin d'Angelot l'Herbier,
Ung gros glasson... Prins ou? En Marne,
Affin qu'a son ayse s'yverne.
De l'estomach le tienne pres.
Se l'yver ainsi se gouverne,
Il n'aura chault l'este d'apres.
CXLV.
Item, rien aux Enfans-Trouvez;
Mais les perduz fault que console,
