La bibliothèque libre.
CLIX.
Item, au Chappelain je laisse
Ma chapelle a simple tonsure,
Chargee d'une seiche messe,
Ou il ne fault pas grand lecture.
Resigne luy eusse ma cure,
Mais point ne veult de charge d'ames;
De confesser, ce dit, n'a cure,
Sinon chambrieres et dames.
CLX.
Pour ce que scait bien mon entente,
Jehan de Calays, honnorable homme,
Qui ne me veit des ans a trente,
Et ne scait comment je me nomme,
De tout ce Testament, en somme,
S'aucune y a difficulte,
Oster jusqu'au rez d'une pomme
Je luy en donne faculte.
CLXI.
De le gloser et commenter,
De le diffinir ou prescripre,
Diminuer ou augmenter;
De le canceller ou transcripre
De sa main, ne sceust-il escripre;
Interpreter, et donner sens,
A son plaisir, meilleur ou pire;
A tout ceci je m'y consens.
CLXII.
Et s'aucun, dont n'ay congnoissance,
Estoit alle de mort a vie,
