« Qui i feront tot lo service Dé
« Jusqu’au jor del joïse. »
La damoisele si fu durement liée
Quant de l’amor Joifroi fu apoiée ;
Vint a la chartre si l’a desveroilliée :
S’en a jeté les puceles prisiées,
En une tor en sont o li poiées.
Li Sajetaire par lo pui se rengierent,
A nos François la bataille requierent,
Quens Aymeris sa mesnie a rengiée,
El chief devant ala .l. eschieles.
La veïssiez tante pointe eslessiée,
Des abatuz fu la terre jonchiée.
Li Sajetaire de rien ne s’esmaierent,
De lor sajetes nos François abatiérent
Qui onques puis sor piez ne redrecierent.
Ce fu domaje et perte.
Quant Aymeris vit ses homes morir,
Molt li en poise, ne vos en quier mentir.
Lo destrier point por les suens garantir,
Et li François le sivent par aïr :
Les Sajetaires vont ensemble ferir,
De totes parz les revont envaïr ;
Adont conmence l’estor a esbaudir ;
- ↑ CXVIII. — 3535 A B La pucele, C D se fesoit forment l. — 3536 A Qui d., C aprochiée, D aprimiée. — 3538 C Si en jeta, D Fors en jeta. — 3539 A B les a celle p. — 3541 omis dans B. — 3542 C D Et Ay. si a sa jent. — 3549 A B Dont ce fu grans domage.
- ↑ CXIX. — 3550 A B Quens Ay. — 3551 C Il li en pese, D Forment l’en poise. — 3554 A B alerent assaillir.
