Le Colovich monta a cheval avec ses Hongrois des la minuit ; et moy, et quelques gentilshommes françois quy m’accompagnoint, allames avec eux : mais ils demeurerent dans le grand retranchement (que l’on avoit fait pour y contenir toute l’armée), quy estoit gardé par le regiment de Strasolde, italien.
Sur la pointe du jour de Saint Michel, 29e du mois de septembre, nous sortimes du grand retranchement avesques deux cens Hongrois pour reconnestre les ennemis : mais nous n’eumes pas fait trois cens pas, que nous trouvasmes en teste quelque cent chevaux. Les dits Hongrois, selon leur coustume, s’estoint tous escartés ça et la pour faire la descouverte, et n’avions pas trente chevaux avesques nous, quy prindrent tous la fuitte en les voyant : mais moy, quy ne pouvois croire que les Turcs se fussent tant advancés, et quy voyois fort peu de difference entre eux et les Hongrois, je crus que c’estoint des nostres, jusques a ce qu’un Hongrois fuyant me cria : « Heu ! Domine, adsunt Turcae. » Ce quy me fit retirer aussy. Mais les Turcs ne nous approcherent jammais de trente pas, craignant les embuscades ; car c’estoit dans des taillis que nous estions, et eux estoint eslongnés de plus d’une lieue hongroise de l’armée quy estoit passée de nostre costé.
Le general Rosworm vint peu de temps après, quy fit passer dans l’isle toute l’armée, a quatre mille hommes pres qu’il laissa a la garde de nostre camp : et apres qu’elle fut passée et mise en battaille, il prit le premier une besche, et commença a combler le dit retranchement, nous y faisant tous travailler pour animer les soldats ; ce quy ayant esté fait en moins de
