declarerent regente de France pendant la minorité du roy, lequel la reine fit coucher quelques jours en sa chambre, jusques apres les funerailles du feu roy, qu’il prit son appartement.
Tous les grands et princes presens tesmoygnerent a l’envy leur zele au service du roy, et leur obeissance a la reine ; et Mr de Nevers, quy lors commandoit a l’armée de Champaigne, fit prester le serment en leur nom.
Le soir on pansa le corps du roy, et on le lava avesques la mesme ceremonie que s’il eut esté en vie : Mr du Maine luy donna sa chemise ; Mr le Grand servit, et l’on me commanda de servir, et representer la place de Mr de Boullon[1].
Le lendemain matin samedy, 15e de may, tous les princes, ducs, officiers, et autres du conseil, s’assemblerent au Louvre, ou, d’un commun accord et sans aucune discordance, on ratifia ce quy avoit esté fait au parlement pour la regence de la reine ; et pour l’autoriser davantage, on fut d’avis de mener le roy aux Augustins, ou pour lors se tenoit le parlement[2], auquel lieu, les pairs seans, fut reconfirmée la regence, et le roy, de sa bouche, l’approuva : puis il revint au Louvre ; et on mit le corps du feu roy en veue a la chambre du trespas, ou l’on luy donna de l’eau benite
