c’estoit la veille de la Pentecouste, il n’y avoit, hors sa famille, que le seul Lomenie, secretaire d’Estat, auquel, sans y penser, je dis : « Quy est un certain demi-prestre bossu, nommé Maignat ? » Il me respondit : « Quy vous fait me le demander ? » « Parce, luy dis-je, que j’en sçay quelque chose. » « Et moy, dit-il, peut-estre davantage que vous. » « Joygnons, luy dis-je, nos sciences, pour voir sy elles se rapportent : il escrivoit, au nom de quelques personnes de condition, en Savoye ; Gueffier en eut quelque lumiere, quy envoya par deça une couverture de paquet escritte de sa main ; on l’a pris comme il jettoít un paquet dans le bureau de la poste ; on l’a desja interrogé, et il commence a chanter clair. » Il me dit la dessus : « Par Dieu, vous estes averty de sy bonne part que je n’ay rien à y adjouter, synon que j’ay esté greffier a l’interroger, et que j’ay son interrogatoire en ma poche. » Je luy demanday ce qu’elle chantoit. Il me respondit : « Puis que vous en sçavez desja tant, je ne vous en celeray pas le reste, ou il parle clair de monsieur et de madame la marquise d’Ancres, mais surtout de Mr Dolet, quy estoit leur organe ; et le tiens bien fin s’il peut desmesler cette fusée : » puis en suitte m’en dit tout le particulier.
Je faisois profession tres estroitte d’amitié avec le marquis d’Ancres, et aymois aussy Dolet ; c’est pourquoy durant le soupper, je songeay plus d’une fois comme je les pourrois ayder et servir, et sortant de table j’allay pour trouver le marquis ; mais il estoit desja retiré avesques sa femme a cause du bon jour du lendemain, et ne peus mesmes le jour suyvant le voir plus tost qu’apres disner en la chambre de la reine
