vous inspirer de vous retirer voyant devant vous des ennemis en peu de nombre et quy n’attendent que nous les joignions pour estre deffaits. »
Il s’approcha lors de moy et me dit tout bas : « Vous ne jugés pas qu’il y a deux mille mousquetaires dans ces hayes, dont je suis bien averty. » Je luy dis : « Au moins, Monsieur, voyons sy cela est : j’iray, sy vous voulés, escarmoucher avesques vingt chevaux a cinquante pas des hayes ; ils ne se tiendront jammais de tirer quelque coup quy nous fera reconnoistre ce quy en est : mais a peine de ma vie qu’il n’y en a point. » Il me dit : « Je le sçay mieux que vous, et vous prie de faire la retraitte avesques vos trouppes. » Je luy dis qu’elle estoit bien aysée a faire devant des gens quy s’enfuyoint. Et ainsy ayans Mr du Maine en nos mains, quy infailliblement y fut demeuré mort ou pris avesques un quart de la cavalerie de leur armée, quy eut donné telle espouvente au reste qu’ils se fussent desbandés en suitte, Dieu nous osta l’esprit et la connoissance de ce que nous pouvions et devions faire, et mit[1] un tel desgoust dans notre armée et telle opinion de nos chefs qu’il sembloit que nous fussions nous mesmes deffaits.
Ce fut le mardy 13me octobre que nous fismes cette belle affaire, ou pour mieux dire que nous ne fismes rien sy non aller prendre notre logement à Villenosse[2].
Le mercredy 14me nous arrivasmes a Nogent ou
