confine a celle de Riés, et n’y a qu’un canal entre deux sur lequel il y a un pont nommé le pont d’Auroit[1] : ils luy dirent qu’ils avoint tellement quellement fortifié ledit pont pour empescher Mr de Soubise et son armée de les venir saccager, lequel pont ils avoint maintenu contre l’attaque que l’on y avoit faite, et que sy on leur vouloit donner cinquante arquebusiers, qu’ils le garderoint, et leur isle, contre toute la puissance ennemie. Marillac leur demanda par ou il falloit aller a l’isle de Periés : ils luy dirent qu’a huit cens pas de Chalans estoit une chaussée par laquelle on y entroit. Luy quy pensoit que cette chaussée ne dureroit au plus que cinq ou six cens pas, apres avoir cantonné promptement le logis du roy, et laissé aux mareschaux des logis et aydes de camp le reste a faire, ayant mandé au roy qu’il s’en alloit a Periés d’ou il luy manderoit nouvelles des ennemis, s’y achemina.
Le bas Poitou est ainsy nommé parce qu’il baisse vers la mer, et que toutes les eaux du haut Poitou y viennent descendre, desquelles il se fait de grands marescages lesquels en basse mer sont secs hormis les canaux ou passent les eaux et [en] haute mer sont inondés hormis plusieurs petites mottes ou il y a des maisons basties en quelques unes, et les autres servent a retirer le bestail jusques a ce que le flux soit retiré : et parce qu’il y a plusieurs petits païs quy ne sont point inondés proche de la mer, ausquels neammoins les eaux douces empeschent l’entrée, il y a des longues chaussées quy y conduisent, quy sont faites a angles saillans et rentrans ; et ces lieux sont
- ↑ Orouet, village aux confins des deux îles, avait une abbaye.
