Page:Bassompierre - Journal de ma vie, 3.djvu/57

La bibliothèque libre.
Le texte de cette page a été corrigé et est conforme au fac-similé.
53
1622. mai.

ses bonnes graces, il s’en prit a moy, et me dit le lendemain lundy 23me, comme le roy fut venu loger en un chasteau nommé Saint Aulais[1], qu’il croyoit que je ne luy eusse pas rendu tous les bons offices pres du roy qu’il s’estoit promis de moy, et me fit de grands reproches dont je me justifiay sy bien qu’il demeura en apparence fort satisfait de moy, et mesmes le lendemain 24me que le roy sejourna audit Saint-Aulais, comme Mr de la Force eut conclu son traitté par lequel le roy le devoit faire mareschal de France, mondit seigneur le Prince, sans en avoir esté prié de Mr de Chomberg, ny de moy, vint trouver le roy et luy remontra que les plus importans chefs de son armée, quy le servoint le mieux, et sur quy il se reposoit et fioit davantage, estoint Mr de Chomberg quy outre la surintendance de ses finances faisoit dignement la charge de grand mestre de l’artiglerie, et moy, quy estois premier mareschal de camp et colonel general des Suisses ; que je luy avois rendu de grands services, et principalement au Pont de Sey, en ces derniers sieges, au secours de Montauban, et a la deffaite de Riés ; que nous avions grand sujet de mescontentement de voir que l’on faisoit les rebelles mareschaux de France et que nostre fidellité et nos services ne nous procurassent autre chose que nostre ruine en nos affaires, ou des coups et maladies mortelles, et qu’il supplioit tres humblement Sa Majesté de vouloir faire reflexion sur ce qu’il luy remontroit.

Le roy pensa sur ce qu’il luy avoit dit, et [m’envoya

  1. Saint-Aulaye est un lieu du canton de Velines, arrondissement de Bergerac, département de la Dordogne.