Page:Descartes - Œuvres, éd. Adam et Tannery, IX.djvu/361

La bibliothèque libre.
Le texte de cette page a été corrigé et est conforme au fac-similé.

LES PRINCIPES

DE

LA PHILOSOPHIE


SECONDE PARTIE.

Des Principes des choſes matérielles.

I. Quelles raiſons nous font ſçauoir certainement qu’il y a des corps.

Bien que nous ſoyons ſuffiſamment perſuadez qu’il y a des corps qui ſont véritablement dans le monde, neantmoins, comme nous en auons douté cy-deuant[1] & que nous auons mis cela au nombre des jugemens que nous auons faits dés le commencement de noſtre vie, il eſt beſoin que nous recherchions icy des raiſons qui nous en facent auoir vne ſcience certaine. Premièrement, nous expérimentons en nous meſmes que tout ce que nous ſentons vient… de quelque autre choſe que de noſtre penſée ; pource qu’il n’eſt pas en noſtre pouuoir de faire que nous ayons vn ſentiment pluſtoſt qu’vn autre, & que cela dépend… de cette choſe, ſelon qu’elle touche nos ſens. Il eſt vray que nous pourrions nous enquerir ſi Dieu, ou quelque autre que luy, ne feroit point cette choſe : mais, à cauſe que nous | ſentons, ou pluſtoſt que nos ſens nous excitent ſouuent à apperceuoir clairement & diſtinctement, vne matière eſtenduë en longueur, largeur & profondeur, dont les parties… ont des figures & des mouuemens diuers, d’où procedent les ſentimens que nous auons des couleurs, des odeurs, de la douleur, &c., ſi Dieu preſentoit à noſtre

  1. Partie I, art. 4, p. 26.