Le texte de cette page a été corrigé et est conforme au fac-similé.
J'apperçoy bien à ceste heure que non
Est vray le bruict et le commun renom :
Car chascun dict que noir est ton plumaige,
Mais il est blanc, voire blanc d’avantaige
Que neige n’est, ne le laict, ne les cignes.
J’en recognois bien maintenant les signes.
Sy donc avec tes plumes tu avois
Le chant plaisant et delectable voix,
Certes, amy, je te jure ma foy
Que tu serois sur tous oyseaulx le roy. »
Lors le Corbeau, esmeu de gloire vaine,
Ouvre le bec, et de chanter prend peine,
Et le fromaige alors chet promptement.
Regnard le prend, et fuyt soubdainement.
Le Corbeau crie en se voyant deceu :
« Je suis trompé, je l’ay bien apperceu,
Et cognois bien qu’on ne doit jamais croire
À ung flateur qui donne vaine gloire. »
