Le texte de cette page a été corrigé et est conforme au fac-similé.
LA COUMÈDI DE LA MORT
De la Mort, coume Dante, as escri la coumèdi,
La coumèdi divino, estranjo ; e sèns rémors,
De la Vido amourous, calignères la Mort
E, vivènt, dins lou cros faguères toun acèdi.
E tant que vers la masco ansin trouvères crèdi
En paupant d’une man soun pitre sènso cor,
De l’autro as caressa la Bèuta puro, amer
Que de tout la Bèuta nous sèmblo lou remèdi.
N’a jamai óublida que i’aviés fa la court ;
T’a ’spera cinquante an, la terriblo mestresso.
Un vèspre de malur, sus soun chivau que cour
Arribo à toun oustau… ni glòri ni tendresso
L’arreston : « Eilavau ta Coumèdi es apresso,
Lou ridèu es tira, vène, qu’es à toun tour ! »
TEODOR AUBANEL.
