Page:Marco Polo - Le Devisement du monde, 1556.djvu/205

Cette page n’a pas encore été corrigée

T R O I S I E S M E   L I V R E
D E   M A R C   P A U L E   V E N E T I E N,
D E S   R E G I O N S   D E   L ’ I N D E
O R I E N T A L E .

Quelles Navires sont es Indes.
Chapitre premier.

En ce troisiesme livre de nostre description des Indes, nous commencerons à parler de la forme de leurs navires. Les plus grandes naufz dont usent les Indois sur mer, sont communement faictes de bois de Sapin, & n’ont qu’un seul plancher, que noz Pilotes appellent tillac, dessus lequel sont dressées environ quarante petites loges pour retirer les marchans. Chacun navire à son gouvernail, quatre mastz & autant de voiles. Les aiz du navire sont joinctz & lassez avec gros cloux de fer, & les joinctures remplies & calfeutrées d’estoupes. Et pour autant qu’ilz n’ont la commodité de la poix au lieu d’icelle ilz enduisent leurs navires d’une huille extraicte de certain arbre, entremeslée & composée avec de la chaulx. En chacun grand navire sont destinez environ deux cens forsatz pour le conduire en pleine mer a force de rames & avirons. Aussi en chacun d’iceulx peut contenir six mille hottées de poyvre. Il y à plusieurs autres petitz vaisseaux qui suyvent & sont attachez a ces grandz navires pour le soulager, conduire les ancres, & servir a la pescherie quand besoing en est.