Page:Marco Polo - Le Devisement du monde, 1556.djvu/251
usques a present nous avons descript sommairement, & comme en passant les isles & regions de l’une & l’autre Inde, assavoir la majeur & mineur. La majeur commence des la province de Maabar, & finist au royaume de Rescomoran. La mineur commence au royaume de Ciamba, & se continue jusques au royaume de Mursil, qui sont les extremitez d’icelles. Or maintenant nous toucherons aucunement celle Inde qui est moyctoienne & entre les deux, laquelle s’appelle Abasie, qui est un pays de grande & spacieuse estendue : car elle est divisée en sept provinces & royaumes, en chacun desquelz y a Roy particulier : desquelz y en à quatre qui sont Chrestiens, les autres trois sont Sarrazins Mahumetistes. Les Chrestiens portent au mylieu du front une croix d’or : aussi des leur baptesme le charactere de la croix leur est imprimé sur le front. Mais les Sarrazins ont un autre signe imprimé, qui commence des le front, jusques a la moytié du nez. Entre eulx se trouve aussi grand nombre de Juifz, lesquelz sont autrement marquez : car ilz portent certain signe en leurs jouës, qui leur est imprimé avec un fer chauld. A ceste region est joignante & contigue la province appellée Aden, en laquelle le benoist S. Thomas prescha la foy de Jesus Christ (comme lon dit) & y convertit plusieurs personnes a la foy : & depuis passant oultre vint au royaume de Maabar, ou il souffrit martyre pour Jesuschrist.
