oſes les plus importantes qu’il avoit à faire ; il luy ordonna auſſi de taſcher de voir le Prince Artamas : en ſuitte dequoy il le congedia, & demeura encore quelque temps dans la chambre d’Araſpe, ſans autre compagnie que celle de Ligdamis, de qui la converſation luy plaiſoit infiniment. Ce n’eſt pas qu’il n’y ait une notable difference, entre un Amant heureux, & un Amant infortuné : mais comme Ligdamis avoit l’ame tendre & complaiſance, il sçavoit ſi admirablement entrer dans tous les ſentimens de Cyrus, que ſon entretien luy eſtoit d’une aſſez grande conſolation : auſſi ce Prince avoit il principalement fait deſſein de paſſer une partie de ce jour là dans le Chaſteau où il eſtoit : parce qu’il n’eſtoit preſques remply que de perſonnes qui eſtoient poſſedées de meſme paſſion que celle qui regnoit dans ſon cœur. Il sçavoit que Panthée aimoit Abradate ; qu’Araminte aimoit Spitridate ; & que Ligdamis & Cleonice s’aimoient tendrement : de ſorte que trouvant quelque douceur à ſe pleindre avec des perſonnes qui n’ignoroient pas la rigueur du mal qu’il ſouffroit ; il reſolut non ſeulement de diſner en ce lieu là, mais d’y paſſer le reſte du jour. Cependant pour ne perdre point de temps, il envoya Chriſante qui l’avoit ſuivy, porter divers ordres dans ſon Armée : & viſiter les Machines qu’il faiſoit faire, à un Quartier qui n’eſtoit qu’à cinquante ſtades de là.
Auſſi toſt que Cyrus sçeut que les Princeſſes eſtoient en eſtat d’eſtre veuës, il fut les voir : car pour luy il avoit mangé en particulier, dans la chambre d’Araſpe, ſans autre compagnie que celle de Ligdamis qu’il mena ſeul à cette viſite : de ſorte que la converſation ſe trouva eſtre compoſée de la Reine de la Suſiane ; de la Princeſſe Araminte ; de Cleonice ; d’Iſmenie ; de Cyrus ; de Ligdamis ; & d’Araſpe.
