Page:Scudéry - Artamène ou le Grand Cyrus, cinquième partie, 1654.djvu/43

La bibliothèque libre.
Cette page n’a pas encore été corrigée

de rien à mon diſcours, de vous nommer tous ceux qui furent de cette Chaſſe : je vous diray ſeulement que tous les hommes n’eſtant pas moins galamment, ny moins magnifiquement habillez que les Dames, tout le monde ſe rendit dans des Chariots au bord de l’Eſtang de Gyges, où eſtoit l’equipage de Chaſſe, & où tous les chevaux attendoient. Doraliſe & moy eſtions dans le Chariot de la Princeſſe, parce que nous le devions ſuivre : & comme c’eſtoit au Prince Mexaris qui eſtoit ſon Chaſſeur, à venir luy aider à deſcendre de ſon Chariot, il n’y manqua pas. Mais à peine commença t’il de paroiſtre, que Doraliſe remarqua, qu’au lieu d’avoir un habillement fait exprès pour cette belle Feſte, comme en avoient le Prince Atys, le Prince Myrſille, Arteſilas, Cleandre, & tous les autres, juſques à Perinthe, il en avoit un, qui à ce qu’elle me dit luy avoit ſervy à une courſe de Chariots, il y avoit plus de deux ans. De ſorte que ne pouvant s’empeſcher de rire ; tout à bon (me dit elle ſi haut que la Princeſſe l’entendit) je voy bien que ce que l’on m’a dit du Prince Mexaris n’eſt pas vray : & que vous en a t’on dit ? luy dis je ; on m’a aſſuré, repliqua t’elle, qu’il eſt amoureux de la Princeſſe : mais puis qu’il eſt encore avare, je ne croy point qu’il ſoit amoureux. Mexaris ſe trouva alors ſi proche du Chariot de la Princeſſe, qu’elle n’y moy, ne puſmes rien dire à Doraliſe : & certes ce fut bien tout ce que nous puſmes faire, que de nous empeſcher d’éclatter de rire. Ce n’eſt pas que Mexaris ne fuſt de fort bonne mine, & fort bien fait ; & que meſme ſon habillement & la houſſe de ſon cheval ne fuſſent aſſez magnifiques : mais comme l’or en eſtoit un peu terny, en comparaiſon de ce luſtre éclatant qui paroiſt à tout ce qui eſt neuf, & que l’on voyoit en l habillement