quelque choſe de mauvais. Mais à peine avoit il fait quelque legere reflexion ſur ces gens là, qu’il en vit deux tirer des poignards : dont l’un voulut en donner un coup à Ciaxare, & l’autre s’avança vers luy pour luy en donner autant. Le genereux Cyrus ſans perdre temps, ſe mit entre le Roy & celuy qui le vouloir fraper : & ſe contenta de parer de la main gauche le coup qu’on luy vouloit porter à luy meſme : pendant que de la droite il arracha le poignard des mains de celuy qui en avoit voulu tüer Ciaxare : & luy en donna un coup dans le corps, qui le fit tomber mort à ſes pieds. Au meſme inſtant huit ou dix autres qui ſoustenoient les deux qui s’eſtoient chargez de tüer le Roy & Cyrus, voyant que leurs compagnons avoient manqué d’executer leur deſſein, voulurent dans la ſurprise où tout le monde fut en cette rencontre, faire ce qu’ils n’avoient pas fait : Mais Cyrus au milieu de ce grand nombre de gens qui mirent l’eſpée à la main, démeſla ſi bien les Conſpirateurs, & les attaqua ſi furieuſement, qu’ils perirent preſque tous de ſa main. Car apres avoir mis en un moment le Roy dans le Temple, entre les mains du Roy de Phrigie & de beaucoup d’autres, il les pourſuivit vers le bord de la mer où ils s’enfuyoient ; & où une Barque de Peſcheurs les attendoit, afin qu’ils s’en peuſſent ſervir pour ſe ſauver. Encore qu’il y euſt un monde eſtrange à l’entour de Ciaxare ; toutefois comme la choſe avoit fort ſurpris, & que peu de perſonnes avoient veû la premiere action, il falut aſſez de temps auparavant que l’on sçeuſt ce que c’eſtoit : de ſorte que ſans Cyrus, le Roy euſt infailliblement eſté tüé : & peut-eſtre meſme que ces aſſassins ſe fuſſent ſauvez. Mais Cyrus aidé principalement de Feraulas & d’Araſpe, les pourſuivit, les tua ; &
