où ſans doute il ſeroit bientoſt. Mais en le congediant, que ne luy dit il point, afin de l’obliger d’employer tous ſes ſoings & toute ſon adreſſe, pour deſcouvrir en quel lieu eſtoit Mandane ? Il ne luy donnoit pas ſeulement des inſtructions neceſſaires, mais cent conſeils inutiles ; & quand Araſpe euſt eu l’eſprit auſſi ſtupide qu’il l’avoit adroit & penetrant ; Cyrus n’euſt pû luy preſcrire un ordre plus exact, de tout ce qu’il avoit à faire : tant il eſt vray que ceux qui aiment fortement ſont preoccupez, & craignent touſjours que l’on ne s’aviſe pas de faire tout ce qu’il faut, pour contenter leur paſſion. Auſſi Araſpe qui eſtoit accouſtumé de vivre avec beaucoup de liberté aupres de Cyrus : ne pût s’empeſcher de luy dire en ſouriant, que ſi Megabiſe euſt eſté auſſi bien inſtruit que luy par Ciaxare, lors qu’il partit pour aller en Armenie, il auroit apparemment raporté plus de certitude qu’il n’avoit fait, du lieu où eſtoit la Princeſſe. Je vous entens bien (luy repliqua Cyrus en l’embraſſant, & en ſouriant à ſon tour) je vous en dis trop Araſpe, je l’avoüe, ſi je conſidere voſtre eſprit : mais je vous en dis trop peu, ſi je veux vous faire comprendre combien ce voyage m’importe. Si vous aviez aimé quelque choſe, pourſuivit il, vous m’excuſeriez ſans doute : mais vous eſtes un inſensible, qui ſerez peut-eſtre puni un jour, par quelque belle Perſonne, de la raillerie que vous faites de vos Amis. Apres cela Cyrus l’embraſſa encore une fois : & ne pouvant pourtant ſe corriger de l’erreur qu’il connoiſſoit bien luy meſme ; il r’appella deux fois Araſpe, pour luy redire une partie de ce qu’il luy avoit deſja dit. Auſſi toſt que ce fidelle Eſpion fut parti, sçachant que le Roy eſtoit occupé avec le Roy de Phrigie, il fut chercher à
