Pièce ajoutée aux Amours Livre II (1567)
[modifier] Elégie à Amadis Jamin
Fameux Ulysse, honneur de tous les Grecs,
De nostre bord aproche toy plus pres,
Ne single point sans prester les oreilles
A noz chansons, et tu oyrras merveilles:
Nul estranger de passer a soucy
Par cette mer sans aborder icy,
Et sans contraindre un petit son voyage
Pour prendre part à nostre beau rivage:
Puis tout joyeux les ondes va tranchant,
S'en retournant ravy de nostre chant,
Ayant apris de nous cent mille choses
Que nous portons en l'estomache encloses:
Nous sçavons bien tout cela qui s'est fait
Quand Ilyon par les Grecs fut defait:
Nous n'ignorons une si longue guerre
Ny tout cela qui se fait sur la terre.
Doncques retien ton voyage entrepris,
Tu aprendras, tant sois tu bien apris.
Ainsi disoit le chant de la Serene,
Pour arrester Ulysse sur l'arene,
Qui attaché au mast ne voulut pas.
Se laisser prendre à si friands apas,
Mais en fuiant la voix voluptueuse
Hasta son cours sur l'onde poissonneuse,
Sans par l'oreille humer cette poison,
Qui des plus grands offence la raison.
Ainsi, Jamin, pour sauver ta jeunesse,
Suy le chemin du fin soldat de Grece:
N'aborde point au rivae d'Amour,
Pour y vieillir sans espoir de retour,
"L'Amour n'est rien qu'ardente frenaisie,
Qui de fumée emplist la fantaisie
D'erreur, de vent et d'un songe importun,
Car le songer et l'Amour ce n'est qu'un.
