Rattachement de la baronnie de Neauphle-le-Châtel au comté de Montfort

La bibliothèque libre.

[modifier] Rattachement de la baronnie de Neauphle-le-Châtel au comté de Montfort (1478)

Sources : Chartes de la Chambre des Comptes, n° 1014, eproduit de Emmanuel de Pastoret (1755-1840), Ordonnances des rois de France de la troisième race, Dix-neuvième volume, Contenant les ordonnances rendues depuis le mois de avril 1474 jusqu’au mois de mars 1481, Paris, Impr. royale, 1828

Loys, par la grâce de Dieu, roy de France ; sçavoir faisons à tous presens et advenir nous avoir receu l'umble supplication de nostre très-cher et très-amé neveu et cousin le duc de Bretagne, contenant qu'il est seigneur de la terre, seigneurie et baronie de Neaufe-Chasel, qui est située et assise auprès de sa terre, comté et seigneurie de Montfort, qu'il tient de nous, ressortissant au siege et jurisdiction de Meulant au bailliage de Mante, laquelle seigneurie et baronie de Neaufle-Chastel, pour l'augmentation de sondit comté et seigneurie de Montfort qu'il tient de nous, il desiroit fort estre unie et jointe avec ledit comté de Montfort, et qu'elle ressortist nuement en nostre cour de parlement, se nostre plaisir estoit faire ladite union, et distraire et séparer icelle seigneurie de Neaufle-Chastel du ressort, siège et jurisdiction dudit lieu de Meulant, et à cette cause nous a fait supplier et requerir nostre grace luy estre sur ce impartie. Pourquoy nous, ce considere, inclinans liberalement à la supplication et requeste de nostredit neveu et cousin, icelle terre, seigneurie et baronie de Neaufle-Chastel avons, pour ces causes et autres à ce nous mouvans, unie, jointe, annexée, et par la teneur de ces presentes, de grace especialc, plaine puissance et autorité royale, unissons joignons et annexons audit comté de Montfort, pour l'avoir et tenir par nostredit neveu et cousin, ses hoirs, successeurs et ayans cause audit comté, ensemble et avec iceluy comté à une seule foy et hommage, et en tous droits, ressort, préeminences, libertés et franchises appartenans audit comté, et, en ce faisant, avons icelle terre, seigneurie et baronie de Neaufle-Chastel desunie, separée et distraite, desunissons, separons et distrayons par ces presentes, des siege, ressort et hommage dudit lieu de Meulant, sans ce que d'ores en avant les subjects, manans et habitans d'icelle terre, seigneurie et baronie de Neaufle-Chastel ressortissent aucunement par appel ne autrement audit siege de Moulant, mais en nostredicte cour de parlement comme font et ont accoutumé de faire ceux dudit comté de Montfort. Si le donnons en mandement par ces mesmes presentes à nos amés et féaux conseillers les gens tenans et qui tiendront notre cour de parlement les gens de nos comptes et tresoriers, au bailly de Mante et à tous nos autre officiers ou à leurs lieutenans, presens et advenir, et à chacun d’eux si comme à lui appartiendra, sauf en autres choses nostre droit et l'autruy en toutes. Donné à Arras, au mois d'avril, l'an de grace mil quatre cent soixante-dix-huit, et de notre regne le dix-septième. Sic signatum supra plicam : Par le roy, Vous, te protonotaire de Cluny et autres presens. J. MESMES.

Visa, lecta, publicata et registrata, Parisiis, in Parlamento, prima die Junii, anno millesimo quatercentesimo octogesimo-quarto. Sic signatum : CHARTELIER.

Collatio facta est cum originali.