Si la beauté se perd, fais-en part de bonne heure
La bibliothèque libre.
Auteur: Pierre de Ronsard (1524-1585)
Recueil : Amours Diverses
Si la beauté se perd, fais-en part de bonne heure,
Tandis qu'en son printemps tu la vois fleuronner:
Si elle ne se perd, ne crain point de donner
A tes amis le bien qui tousjours te demeure.
Venus, tu devrois estre en mon endroit meilleure,
Et non dedans ton camp ainsi m'abandonner:
Tu me laisses toymesme esclave emprisonner
Es mains d'une cruelle, où il faut que je meure.
Tu as changé mon aise et mon doux en amer.
Que devoy-je esperer de toy, germe de mer,
Sinon toute tempeste? et de toy, qui es femme
De Vulcan, que du feu? de toy, garse de Mars,
Que couteaux, qui sans cesse environnent mon ame
D'orages amoureux, de flames et de dars?
