Cant voi l’aube du jour venir
Cant voi l’aube du jour venir,
Nulle rien ne doi tant haïr,
K’elle fait de moi departir
Mon amin, cui j’ain per amors.
Or ne hais riens tant com le jour,
Amins, ke me depairt de vos.
Je ne vos puis de jor veoir,
Car trop redout l’apercevoir,
Et se vos dit trestout por voir
K’en agait sont li enuious.
Or ne hais riens tant com le jour,
Amins, ke me depairt de vos.
Quant je me gix dedens mon lit
Et je regairde encoste mi,
Je n’i truis point de mon amin,
Se m’en plaing a fin amerous.
Or ne hais riens tant com le jour,
Amins, ke me depairt de vos.
Biaus dous amis, vos en ireis ;
A deu soit vos cors comandeis
Por Deu vos pri, ne m’oblieis !
Je n’ain nulle rien tant com vos.
Or ne hais riens tant com le jour,
Amins, ke me depairt de vos.
Or pri a tous les vrais amans
Ceste chanson voixent chantant
Ens en despit des medixans
Et des mavais maris jalous.
Or ne hais riens tant com le jour,
Amins, ke me depairt de vos.