Pastourelle

Anonyme

Pastourelle

Romances et pastourelles françaises des XIIe et XIIIe siècles, Texte établi par Karl Bartsch, F. C. W. Vogel ; Slatkine reprints 1973, 1870 (p. 126-127).

DE Saint-Quentin a Cambrai
chevalchoie l’autre jour.
lés un boisson esgardai,
touse i vi de bel atour :
la colour
ot fresche com rose en mai.
de cuer gai
chantant la trovai
ceste chansonnete :
’en non Deu, j’ai bel ami,
 cointe et joli,
 tant soie je brunete.’

Vers la pastoure tornai,
quant la vi en son destour,
hautement la saluai,
et dis ’Deus vos doinst bon jour
et honour !
celle ke ci trové ai,
sans delai
ses amis serai.’
dont dist la doucete :
’en non Deu, j’ai bel aml
 cointe et joli,
 tant soie je brunete.’

Deles li seoir alai,
et li priai de s’amour.
celle dist ’Je n’amerai
vos ne autrui par nul tour,

sens pastour
Robin, ke fiencié l’ai.
joie en ai,
si en chanterai
ceste chansonnete :
 en non Deu, j’ai bel ami,
 cointe et joli,
 tant soie je brunete.’