Le Mespris de la vie et consolation contre la mort/« Nostre vie est semblable à la lampe enfumee »
Le Mespris de la vie et consolation contre la mort
XL.
Notre vie est semblable à la lampe enfumee,
Aux uns le vent la fait couler soudainement,
Aux autres il l'esteint d'un subit soufflement
Quand elle est seulement à demi allumee ;
Aux autres elle luit jusqu'au bout consumee,
Mais en fin sa clarté cause son bruslement,
Plus longuement elle art, plus se va consumant,
Et sa faible lueur ressemble à sa fumee ;
Mesme son dernier feu, est son dernier cotton
Et sa derniere humeur, que le trespas glouton
Par divers intervalle ou tost, ou tard consume :
Ainsi naistre & mourir aus hommes ce n'est qu'un,
Et le flambeau vital, qui tout le monde allume,
Ou plustost ou plus tard, s'esloigne d'un chacun.