Le Mespris de la vie et consolation contre la mort/« Qu’est-ce que d’estre mort ? »
Le Mespris de la vie et consolation contre la mort
XLI.
Qu’est-ce que d’estre mort ? que n'estre plus au monde,
Avant que naistre au monde, enduries vous douleur
Ne point naistre en ce monde est ce quelque mal-heur ?
La mort, & le sommeil marchant en mesme ronde :
De la mer de nos maus la tempestueuse onde
Du dormant, & du mort ne peut alterer l'heur,
Le dormant, & le mort n'ont un repos meilleur
Sinon quant le sommeil, ou la mort leur redonde :
La vie est celle la qui nous met en tourment,
Et la mort du peril nous tire au sauvement,
Mais nous la diffamons seulement par envie :
Accusons la saison ou nous n'estions pas nez
Des tourments espineus dont nous sommes geinez,
Et diray que la mort est pire que la vie.