Œuvres complètes de Theophile (Jannet)/J’ai trop d’honneur d’estre amoureux
(Redirigé depuis Œuvres poétiques (Théophile de Viau)/Première partie/XXVIII. Stances)
Œuvres complètes de Théophile, Texte établi par Charles Alleaume de Cugnon, Jannet, , Tome 1 (p. 208).
STANCES.
’ai trop d’honneur d’estre amoureux,
Et voy bien que les plus heureux
Ont droict de me porter envie ;
Mais, quoy que menasse le sort,
Je puis bien deffier la mort.
Puisque vous possedez ma vie.
Les plus devotieux mortels,
Rendant leur service aux autels
Qu’on dresse aux deitez supresmes,
Ne font brusler que de l’encens,
Et pour vous adorer je sens
Que je me suis bruslé moy-mesme.
Les roys ont de divers honneurs :
Leurs esclaves sont des seigneurs,
Les elemens sont leur partage,
Toute la terre est leur maison ;
Moy je n’ay rien qu’une prison,
Mais je l’estime davantage.