Œuvres complètes de Theophile (Jannet)/Dans ce temple où ma passion

La bibliothèque libre.
Sauter à la navigation Sauter à la recherche

{{Navigateur| XXXII. Consolation à M. D. L. Stances |

STANCES.


Dans ce temple où ma passion
Me mit dedans le cœur les beautés de ma dame
Je benissois l’amour, encore que sa flamme
Destournast ma dévotion.
Au lieu de penser à nos Dieux
J’adorois, vous voyant, l’image de Diane,
Et m’estimois heureux de devenir profane
En me consacrant à vos yeux.
Ce fut avec de mesmes traicts
Que la mère d’Amour perça le cœur d’Anchise ;
Suis-je pas glorieux de donner ma franchise,
A la mercy de ses attraits ?
A ce premier ravissement

Mon ame triompha de se sentir blessée,
Et l’autel m’eust despieu d’oster à ma pensée
L’entretien d’un si doux tourment.
Ne deust le ciel faire périr,
Je mesure ma peine avecques mes années,
Et l’amour se fait fort d’oster aux destinées
La puissance de me guérir.
Au poinct que ceste ardeur m’a mis,
Mon superbe bon-heur se mocque de l’envie,
Et, quelque mal qui vienne à menacer ma vie.
Je me ris de mes ennemis.
Tout ce monde de poursuivans
Me fait persévérer avecques plus de joye :
Ce renommé Jason n’eust jamais eu sa proye
S’il eust craint la mer ny les vens.
Soubs l’auspice de vostre loy
Il n’est point de grandeur que mon esprit ne brave.
Et le mesme accident qui me faict estre esclave,
Il me semble qu’il m’a faict roy.