| ◄ Laisse CCCXCIX | Laisse CCCC | Laisse CCCCI ► |
François entrent es lices ou les penuns reiaus ;
Lor cors desarmerent ; mult i oit enavrez d’aus.
E Paiens en la ville tornerent comunaus ;
Les ponz ferent levier e serer les portaus.
Le jors eurent heüs un crüel batistaus.
L’enperere en son tref fu forment d’ire caus ;
Anz ne l’ousent garder François ni Provençaus :
Plus le redoterent qe perdriz le girfaus.
Par le consel Naymuns, le buen duc naturaus,
Ensirent fors de l’ost, armés, sor bon cevaus,
De cels qe repausez furent et sains et saus ;
Vers la cité s’en vont le droit chemins qaraus
E menerent dou mil Flameins o ars pugnaus,
Estroit et arengiez tres par mi les ortaus.
As portes de la vile venirent d’un galaus ;
La trarent maintes guivres, saietes et quaraus,
Feu greçois berserent outre as murs as hostaus ;
E cels dains lancerent pieres et dars et paus.
Quant oï la novelle Balegant l’amiraus,
Un graile feit bondir sor le mestre toraus
A ce qe s’armasent chevalers et bidaus.