| ◄ Laisse CCCCLXXVIII | Laisse CCCCLXXIX | Laisse CCCCLXXX ► |
Por voloir castoier li coarz et li van
E fer en cortoisie retorner li villan
E les retors de tere encroire en consoil san
Me sui mis a trover dou meilor Cristian
Conque seüst canter jogleors en roman,
Ni qi mais donast robes ni cheval ni teran.
Ce nos conte l’istorie, il fu le primeran
Qe fist mener en destre destrier noir ni bauçan
E qe treist d’un vasel et .x. et .xii. man,
Qe soloient mangier con font li Indian :
En escüele fist mangier et metre pan,
Entre dos un plater. Oiez hom soveran !
Je qe sui mis a dir del neveu Carleman
Mon nom vos non dirai, mai sui Patavian,
De la citez qe fist Antenor le Troian,
En la joiose Marche del cortois Trivixan,
Pres la mer a .x. lieues, o il est plus proçan.
En croniqe letree, qe escrist da sa man
L’arcivesque Trepins, atrovai en Millan
L’estorie e la conquise dou regne Castellan
Qe fist le neveu Carles por coroner Audan,
La seror Oliver, q’el plevi soz Vian.