| ◄ Laisse CCCCXCI | Laisse CCCCXCII | Laisse CCCCXCIII ► |
Quand fu acordés Karles e ses François,
En estant s’est levés et a dit qe cortois.
« Seignor », dit l’emperere, « por voir sai e conois
« Qe une gran partie de celor qe je vois
« Por Rolland moi servent e non por autre drois ;
« Mais sor ce q’ai feit dois metre defois.
« Je vos dirai qe trop fu gran buffois
« Cum .xx. mil chevaler, armei a bon corois,
« Partir d’une bataile. Ne fu ce estrelois ?
« Je vi en celui jor ma gent en tel effrois,
« Se aveü en fusent Paiens et Espanois,
« Tel perte i aüs feite, nel teneç a gabois,
« Ja ne fust amendé a plus de cinq cent mois.
« Por vos, seignor baron, sui emperer e rois ;
« Vos m’aveis feit honor, ancor le me ferois.
« Neporquant se je ai fet ver mon niés nul desrois
« E j’en sui repanti, sor moi cheit li sordois.
« Rollant se il m’a gerpi, vos ne mi garpirois,
« Ains mantendrai la guere, e vos m’i aiderois,
« E vostre ert le païs, quand vos conquis l’avrois.
« Neporquant vos en pri, si vos .... la crois,
« Cil qe ont bon destrer ne il tienent en repois,
« Mais alez mon niés qerre, se trover le porois :
« Qi mener le me poit, bien saçe demanois
« Tant ni savra qerer q’il n’ait plus qatre fois. »
Donc se corent armer cinq cent des Eurupois,
Et ensirent des ost qerant por ceus camois
E a .x. et a .xx. por trover li marchois.
Saracins les veoient, si les mostrent al dois ;
De la ville ensirent troi mil arçer Turchois
Sor bon chevaus isniaus, tuit serés, d’un galois ;
Se plus atendisent, jas eüsent enclois.
Cristïen s’en tornerent arier a gran esplois ;
Li plusor descenderent e vont a dir au rois
Qe ses niés ni est trové ni en plain ni en marois.