| ◄ Laisse DCXIV | Laisse DCXV | Laisse DCXVI ► |
— Mon sir », dit le estormant, « por Diés, ne dites mie.
« Se vos metisse a tere en icele partie
« Ou n’i a qe Paien, ce seroit gran folie :
« Se quatre mil fusés, s’i perdrïés la vie.
« Non veés vos li poi e li bois d’Aumarie ?
— Amis », ce dit Rolant, « se Diés te benoïe,
« Fa moi ce qe te proi, e ferais cortesie.
« Que caut nus, se je fais o sens o estoutie ?
« Je sui trop saolés de dormir en galie,
« A poine qe la mer ait mais sor moi bailie,
« Qe, qant est aïree, proiere que l’en die
« Li ne vaut ni menace, ja ne doute une lie ;
« Ci ne vaut ardimant ni forçe ni meistrie.
« Mais se je sui a tere cun ceste compagnie,
« Sor nos qevaus armés, je croi cescuns se fie
« De combatre un Paien, se rien li contrelie,
« Cent argomant i a in tere de notre garantie :
« Tel est ardiz an tere qi an mer s’oumelie.
— Voir dites », feit Sansons, « por Diex, li fiuz Marie. »
Aqilant le convers au mariner escrie :
« Car nos met a la tere ; fous est qi plus detrie.
« Ja savons les langajes de Spagne le garnie ;
« Se Carles en Espagne ert ou la baronie,
« Bien le savrons trover, demandant la contrie ;
« Le langaje Espanois nos fera grant ahie.
« Pués a ci troi barons de tel qevalerie
« Qui me font conforter en cescune partie.
— Ni vos », ce dit Huon, « n’ameis pas coardie. »
Adonqe l’estormant a la tere les guie.